|
|
《bear》？莫非係可爱类型嘅卡通片？……
寻晚睇广州台，节目介绍到《可可西里》呢出电影，係讲保护藏羚羊嘅故事，因为以前睇过中央台嘅有关记录片，觉得几有feel，所以今日down咗《可可西里》黎睇
节目里面导演陆川讲过，希望呢出电影会写下中国电影嘅历史一笔，唔知系米因为呢句话，我对呢出电影嘅期望比较高。但睇完之后，发觉有啲失望，呢出电影太“电影”了，虽然呢出电影俾人嘅视觉好强嘅冲击……
电影开头无几耐就出现高原荒凉景色，非法猎人猎杀藏羚羊，巡山队员强巴被杀，然后其他巡山队员为强巴举行天葬，记者尕玉采访以白泰为首嘅志愿巡山队……故事从此铺开……
唔想讲太多剧情，电影里面音乐好少，对白好少，演员多用肢体语言表达，动作十分富有造型感，可能係导演有意所为，初次睇好似拍得好朴实，但回头一想，其实正係电影嘅煽情之处。
人物塑造方面，印象比较深刻嘅係白泰、尕玉、刘栋，同马占林，其他人感觉上好难分清，刻画唔够鲜明，不过一出电影亦都唔可以做到面面俱到嘅，但总係觉得呢种题材嘅电影，每个人嘅性格应该更加鲜明D。
令我觉得最难理解嘅，係导演将人物感情刻画得好冷酷——可以毫不手软咁殴打俘虏逼佢地讲出猎杀分子嘅行踪；係食物、汽油、弹药都就快无嘅时候，白泰将剥皮嘅人留係沙漠，等佢地自己走出去，自己就继续同其他队员去追赶猎杀分子；到后来，其中一部车爆缸，白泰仍然要去追赶猎杀分子，而将队员留係沙漠等待其他人黎救援；直到最后剩翻白泰同记者两个，见到猎杀分子嘅时候，毫无反抗之力，最后白泰被杀死、留係沙漠嘅队员冻死、刘栋被流沙活埋……白泰呢种宿命般嘅近乎失控嘅追踪，不计后果不择手段，直到最后自己被杀，令人觉得非常嘅冷漠，但以前睇中央台嘅记录片，采访嘅巡山队员根本无咁冷酷，就算话係只对敌人冷酷，我仍然觉得难以接受，好明显係导演嘅意图，为咗表演激烈冲突嘅戏剧效果……
讲到呢度，已经唔想再讲咩啦，视觉效果唔错，但係严重缺失人文关怀，使呢出电影剩系停留係一时嘅感官冲击嘅层面上面，就好似张大导而家嘅电影咁，俾人一种讨好煽情嘅感觉，相比起外国电影，就更加可以睇到差距。《Schindler's List》虽然係讲残忍嘅纳粹大屠杀，不过片中处处透出人文关怀，令人睇到希望，使电影唔会陷入屠杀同报复嘅怪圈之中，不愧为奥斯卡经典，上网见到有文章话要推《可可西里》去参加奥斯卡，个人认为机会唔大，就好似张大导嘅电影一样。
不过，《可可西里》嘅拍摄技法应该值得其他导演学习，多角度转换，镜头摇晃……视觉冲击力强，有啲类似杜可风嘅拍摄风格，不过杜可风嘅应该高一班，佢嘅摄影配合王家卫嘅电影同张叔平嘅配乐，十分之正啊。
结论，呢出电影唔会係中国电影嘅历史一笔，但一定会令人印象深刻~~~
最后，知道咗一样嘢，可可西里嘅藏文意思——美丽的青山美丽的姑娘~~~ |
|
IP卡
狗仔卡
发表于 2004-10-6 20:25
显身卡
