黄子华栋笃笑句选

盼盼

喂~顶..望咩望~哈哈..~baby~你要释放..baby~我只系记得.男亲女爱入面.你见到你讨厌嘅人.你同渠讲10句i love u.就会干戈化玉帛.一切烟消云散..




愛情
白雪公主，幾咁純潔無瑕。但系諗真啲，白雪公主，識得嗰個系王子，灰姑娘識嗰個又系王子；有個有特殊嘗好，鍾意錫青蛙嘅女人錫咗只青蛙一啖，只青蛙變出嚟嘅又系王子！有冇人諗過根本個王子系同一個人呢？根本呢個王子都不知幾花心，周圍溝女，重無良到扮青蛙去溝添！


情竇未開
我第一次戀愛之前，我認爲自己就系楊過，而我同書裏面個楊過唯一唔同嘅地方，就系佢有只大鵰。而我嗰陣，就鍾意撚呢個相思同畫眉多啲。同楊過一樣，我從來冇諗過要考第一。
我只需要愛情，只要搵到我嘅小龍女，我就可以抛棄學業，退隱山林，搬入新界住。但系我一定要住西班牙別墅，我唔住得村屋，我怕蛇蟲鼠蟻。然後每個月至多出一次市區，不過我唔會逗留得耐，問亞媽攞完零用錢我就會入番入去。
冇錯，基本上，我由中一至中五都系喺呢種咁超然嘅思想下度過。嗰陣時學校最流行嘅辯論題目系：“中學生應否談戀愛？”我認爲，我哋應該辯論嘅系“中學生應否讀書？”
而喺我第一次戀愛之前，我嘅小龍女只需要一個條件，就系靚，我知我咁樣諗好膚淺，但系嗰陣時我重細，唔知道原來身材都好重要架。


性
聖人話:“食色性也！”食同色，好唔同！一個人無論幾鍾意食，會唔會畀幾十蚊入戲院睇套“蒸氣騰騰小龍包”？一個人無論幾鍾意食，又會唔會爲咗望一嚿冇包住嘅牛肉望到畀車撞？


愛情
戀愛唔系PART-TIME，你唔可以話：“愛！做完咪走囉！”戀愛系一盤生意，你要二十四小時諗住佢。自己生意，冇所謂PART-TIME正識。人哋放假或者過年過節，你更加要開OT添。行花市啦行海邊啦睇戲食飯啦.
你有乜嘢競爭對手呢？我冇競爭對手？！你估你系專利巴士公司啊？港巴都執咗啦！有冇考慮結婚？咁就要向公衆交代，咁就即系上市啦！所以，“中學生應否談戀愛”唔系問題，問題系“人類應否有兩份全職工作？”
你再拍拖，需要知會你老闆：“老細，我出面搵咗份戀愛，我真系好需要呢份戀愛，不過公司啲嘢我會照做，我兼顧到架。”然後你老闆會話：“咁你不如搵多份戀愛，咪直情唔使返呢份工囉！”


新鮮
依家啲人溝女，對條女最大嘅要求系乜啊？唔系靚，最緊要，系夠新鮮！
乜嘢叫做夠新鮮啊？就系話，溝咗一年嗰個，就唔夠溝咗半年嗰個咁正。因爲半年嗰個新相識，新鮮啲。同樣，溝咗半年嗰個，就唔夠三個月咁正。溝咗一個月就唔夠半個月嗰個咁正。溝咗一日就唔夠半日嗰個正，如此類推，終於.溝咗嗰件，就唔夠未溝嗰件咁正！
噉即系點呢？重溝唔溝好呢？一溝就唔正？！

盼盼

女人偉大
黃：喺愛情之中，女人最偉大！
男人嘅犧牲，就爲咗追求美麗；而女人嘅犧牲，就只系得到一個麻甩佬！而最偉大嘅系佢哋根本唔覺得系犧牲。
如果你話畀一個女人聽：“喂，你男朋友有口臭！”
張：車，人梗有局部缺點嘅！
黃：佢重有臭狐同香港腳喎！
張：噉佢咪好平均咯！
黃：佢啲鼻鼾聲唔使較咪啊！
張：我男朋友一定系夢見我，我開心。
黃：佢屙尿亂咁啡！
張：好壯啊！
黃：佢啡完唔洗手！
張：邊有男人洗手架！
黃：我有！
張：乸型！
黃：佢重講粗口啊！
張：但系佢心地好！
黃：佢喺電梯度食煙喎！
張：公衆場合都唔畀食咯，佢咪呢埋一邊食囉，你哋重想點啊！你系咪想逼死佢？！系咪想逼死佢？！嗚～～～


責任何在
如果你話我聽，因爲我唔靚仔，所以唔可以做戲，你唔應該話我聽！因爲唔關我事，我唔應該負呢個責任，你應該同我父母講，系佢哋搞成我咁嘅。如果你要罰，應該罰佢哋。以後，邊個醜樣，就罰佢爸爸媽媽唔准做戲！或者剩系做茄呢啡！
我唔系一個唔負責任嘅人，爲我爸爸媽媽嗰短短一剎嘅快感，我已經負責負咗廿幾年。你估做我好易做啊？
我細個讀書唔好，或者唔合格，我冇要父母負責。我自己簽曬啲成績表嘅。
每當我爸爸媽媽有爭執鬧交嘅時候，我有冇叫佢哋爲咗我嘅童年著想，忍下對方？冇！我叫佢哋出街鬧！
我大個咗，唔知應該信邊個宗教，唔知做人爲乜，唔知人生事業嘅方向都冇要求父母照顧我。
反而系我調番轉頭，提醒佢哋：你哋要搵錢啊，積穀防饑啊，唔系第日老來無依無靠啊！
.
乜嘢都系我！

盼盼

男仔唔使靚仔
靚仔系唔系真系咁重要啊？有啲人話男人唔駛靚仔嘅，有才華咪得囉。
系，你有冇試過帶你嘅才華去落disco識女仔啊？人哋啲靚仔一行入去，唔使二十分鐘，就已經同啲女仔互相問問題：“你度定我度？”
我帶住我嘅才華入到去，幾艱難先搵到個女仔肯畀個機會我。唔系畀機會我交換問題，而系畀機會我天才表演。
唱歌跳舞做話劇講大話功夫表演，成套歡樂今宵一個人做一次.


演戲天份
我從小就知道，我系一個偉大嘅演員。
人哋細個成班細路群埋，鍾意玩扮結婚，扮爸爸媽媽。我細個，就鍾意扮姦夫淫婦。
但系唔知系咪我個樣比較老實，我系從來都冇機會扮姦夫。每次我都系扮淫婦.嘅老公。
雖然系咁，雖然，我亦都系成班人之中最細嗰個。但系我已經可以將一個妒忌嘅男人心態表現得淋漓盡至。
當然，我啲朋友個個都贊我，話我天生出嚟，就系戴綠帽嘅。


死亡
細個嗰陣，我系唔怕死嘅。
我覺得，系以前啲人先會死嘅。系歷史書裏面嘅人至會死。好多人唔明歷史有乜用，歷史咪話你聽邊啲人死咗囉。
我從來未睇過一本歷史書有提到黃子華呢個名，我點會死啊。最緊要系，就算死都唔系乜嘢一回事。
細個嗰陣隔離陳師奶成日叫佢老公：“咁多人去死你重唔去死？”
然後去完番嚟，阿陳師奶又會話：“死番嚟喇？唔死多陣添？”
所以我一路都認爲，去死，即系去街，同埋一定唔會去好遠。因爲阿陳生每次都好快就返嚟嘅。


賭馬
喂，賭馬系需要付出好多架。
朝早要睇晨操夜晚要睇董驃，又要同朋友交換讀書報告。
你估我哋睇得書少？市面幾多馬經啊？
重唔系話你睇得多就得架喎！
香港啲馬經，一埸十隻馬，十隻馬都有人貼，你自己思想唔夠獨立，噉你就死梗喇：唔該，呢場每只幫我落100蚊啊！希望中啦！
夏天嚟喇，抖暑啦，你估系畀啲馬休息咩？系畀我哋休息啊！


泳池
黃：去公衆泳池嗰啲唔系叫做游水，嗰啲叫做浸水。因爲喺公衆泳池遊，只可以用一種泳式，就系彈式，同一個位，彈下彈下。
張：如果系高手可以用式，但系要潛落水底嗰度用。
黃：點解香港啲泳池咁鬼逼嘅呢？
張：唔好問啊，趁人多你好快啲浸下。等陣所有人上曬水嗰陣，你就會發覺，個池啲水原來到膝頭哥架咋！你去浸腳指啦，下次。
黃：其實我哋香港人都習慣咗人多，去浸下水都好。但系可惜嘅系，呢啲水，唔系一般水，呢啲系暖水！你成日喺泳池度，你會發覺有啲人，全身唔喐，眼碌碌。
張：哦！你喺泳池屙尿，咁冇公德心！由細到大我老豆都教我架啦，急尿，去隔離池吖嘛！
黃：所以我喺度，趁呢個機會，同你啲儬仔講啊！遊遊下小童池就走過嚟大人池，擒喺個池邊，唔好話我聽系學游水啊！
張：特別系擒正喺噴水口嗰啲啊！想毀屍滅迹啊！

盼盼

改名
改名，只系啲父母將自己嘅主觀意願套喺啲仔女身上。所以大部份女仔唔系叫美乜就系麗乜。男仔唔系叫阿堅，就系阿強，一唔系就叫阿祥。噉我哋系咪好美麗，好堅好強好長呢？


黑白不明
我非常欣賞鄧小平嘅“黑貓白貓，捉到老鼠就是好貓。”我老友阿雄個老婆生仔，生咗個黑人出嚟，我都系咁對佢講：“黑仔，白仔，快高長大就系好仔！”


鬧人
以前我哋笑人，會話：“你有得發達？太陽由西邊出嚟啊！”依家我哋就會話：“你有得發達？建築面積等於實用面積啊！”
又或者話人醜，現在我哋都會技巧好多：“你唔醜，你點算醜啊，你系塊面唔多實用噉解嘛。你嘅鼻台太大，啲眼耳口鼻咪唔見使囉。”


失戀
失戀系會令人成長嘅。我失戀之前，一向都覺得世界上所有問題都有答案。
點解我哋每日都要8點鍾起身返工啊？因爲夠鍾囉！
點解我哋有夠鍾呢樣嘢啊？因爲我哋唔用浮動上班時間囉。
點解呢個世界有戰爭？因爲我哋有武器囉。
噉點解我哋要有武器啊？因爲佢哋有武器囉。
一切都有答案，直到我失戀。
阿珍，點解你唔愛我？阿珍畀咗一個經典嘅答復我，佢話：“愛情系冇點解架，系唔可以解釋架，唔好問啦。”（記緊呢句啦）
如果番學阿sir問我嘢都可以噉答就好啦！“黃子華，物體燃燒點解需要氧氣啊？”
“阿sir，系冇點解架，系唔可以解釋架，唔好問我啦！”


隆胸
葉子楣簡直爲演藝界創下新標準。
以後啲女仔想做明星，又唔使睇樣，又唔使睇演技，去磅啦！（加強語氣）得，入去磅一磅就得啦。“開嚟，六斤半，片酬系六千五蚊一日，小姐做唔做？”“開嚟，八斤有疤痕，八千減一千疤痕費，即系7千蚊一日。”
你話幾客觀呢！

盼盼

放假
黃：一般人都會好珍惜每年一度嘅年假！
張：今年我要去夏威夷遊下水。
黃：如果你決定去夏威夷，你就要預咗付出沈重代價！前四後六！
張：我講緊系年假，唔系産假啊，子華！（真系啊.）
黃：前四後六嘅意思系，喺你放假之前嗰四個禮拜，同你放假之後六個禮拜，都要做到仆街！（死未）因爲無論你放幾耐假，你嘅嘢始終系你做番。
張：系你嘅始終系你嘅！
黃：唔單止，放完假，唔系你嘅都會變成系你嘅！


金撈
點解要帶金撈？唔帶撈，有乜資格同人講，時間系寶貴？我嘅時間點值錢呀？（你話系唔系先）
嗱，支時針圍住行一個圈，12個鍾，十幾皮嘢，即系爲皮幾嘢一個鍾。你一個鍾值幾錢啊？
幾舊水？我點同你一齊食飯啊，大家時間觀念咁唔同！
唔單止噉，你帶撈，表示你個人有幽默感。勞力士，有邊個靠勞力搵食嘅人帶得起勞力士啊？越帶勞力士嘅人就越表示佢唔使用勞力！呢啲，就叫做幽默感啦。

自重

當乜嘢人都唔搵我做嘢，我就知道，我系一個偉大嘅藝術家，在生嘅時候系唔會獲得應得嘅尊重。唔止咁，我重偉大過偉大嘅藝術家，因爲我知道，我死後都唔會受到尊重。


紅館

依家做歌星，好犀利，因爲有紅磡體育館。因爲呢樣嘢，做歌星，可以喺一晚，就賺曬你哋朝九晚五一世人都搵唔到嘅錢啦！
啲人話：“我真系唔明張國榮點解要退休。”點解？佢一晚已經搵咗你一世搵嘅嘢，佢一晚已經做咗你一世人要做嘅嘢，重有乜嘢可以做啊？唔退休做乜？做五場，已經輪回五次！做三十場，輪回三十次，如來佛祖都話：使唔使？
啲人話，唔系嘅，佢唔捨得退休嘅！佢最後嗰場演唱會，佢自己都喊架。佢系喊，不過唔系爲自己喊，系爲咗你哋喊啊：“我就退休啦，我聽日就唔使DO啦，你哋聽日重要番九點，唔好遲到啊！”

盼盼

女人愛情觀
女仔對愛同鍾意有好大嘅分別，如果個女仔知道個男仔鍾意佢呢，佢都會同佢去嚇街，睇嚇戲，食嚇飯，但想做進一步嘅嘢就唔得啦。
而女仔知道個男仔愛佢嘅時候系絕對可以付出更多。喺女仔心目中，鍾意等於“幫襯”。
但愛喺女仔心目中等於“收購”，收購包括“注資”，然後“合併”.（系呀，系呀！）
所以女仔要男仔將佢嘅愛注資落嚟，護口注資落嚟，最重要嘅系錢注資落嚟。
然後去買Joyce啦，Panda啦，Gueeo啦，買到一身都系，等佢認爲可以鞏固佢自己嘅價值，但佢哋系絕對冇得到男方嘅同意架！
嗱！我宜家同你哋講啊，你哋嘅黑箱作業，好容易破壞男方嘅經濟架！（你哋都好有共鳴啦）


男人愛情觀
男仔對愛就好隨便，愛同鍾意都冇分別，只要佢知道你鍾意佢，即刻可以帶你返屋企，或者去你屋企。
系唔系男仔心中冇愛呢？我覺得又唔系喎。系佢哋比其他人更清楚愛嘅定義。愛系乜呢？根據耶蘇嘅講法系：“愛系恒久忍耐又有恩賜，愛系不張狂，不大喚，不作害羞的事，忘記別人的錯。”
你話啦作爲小小男人嘅我哋又點可以隨隨便便同你講聲愛啊！
所以以後有人同你講愛，一就系佢講大話（加強語氣），二就系有個耶蘇喺你面前啊。
但耶穌主張愛人如己任，博愛架！

盼盼

迷惘

喺公司，老闆會同我講：“你返嚟唔系瞓就系去廁所，你當呢度系屋企啊，呢度系公司啊。”
我返到屋企，阿媽又會話：“你重當呢度系你屋企咩，你返嚟唔系霸住個廁所就剩系識瞓！”
噉.噉我番屋企又唔瞓覺又唔去廁所，返公司又唔去廁所唔瞓，噉我呢啲嘢去邊度做啊？
不過後嚟我諗過自己又系過份啲嘅，於是我就痛改前非。以後返屋企我就剩系瞓覺，返公司就剩系去廁所。


老竇

我一向以爲老竇，系option嚟嘅，附加架咋。
冇錯，大部份人系有老竇嘅，就正等於大部份嘅車系有收音機一樣。但系嗰樣系option嚟咋嘛，唔系架架車都有。所以我細個嗰陣好憎啲儬仔成日喺我面前話：“我老豆點點點.”
我覺得嗰啲人好曬命，就好似你有部車，不停咁同人講：“我部車開蓬嘎，大包圍嘎！”你不如話：“你老竇開蓬嘎，用無鉛汽油架.”


十八歲

點解十八歲先至系合法年齡呢？因爲到咗十八歲，喺法律上我哋就要對自己負責任
多餘，唔通十八歲之前，我哋就唔使對自己負責咩？唔通十八歲之前，我就可以隨時撲出馬路：“我唔信啊，我17歲半咋，你敢撞死我？”
唔通十八歲之前，我喺油麻地踩完個紋身佬一腳，個紋身佬會話：“死儬仔，你未夠十八歲，我忍你！”
唉，十八歲嘅最大好處，就系呢度！

盼盼

呢条友好聪明啊～[em09][em09]

DOGMONKEYPEACH

我都觉得距好聪明！

顶下！

盼盼

佢又开Ｓｈｏｗ啦～

DOGMONKEYPEACH

乜SHOW？

盼盼

栋笃笑咯～
好似上个星期开嘎～

开水江

支持一下,好多

盼盼

点了一下ＬＳ的ｌｉｎｋ～
原来真的有东西呀！

kyd

支持華仔！！
好中意栋笃笑！！

fsxf

仲有"人生3大矛盾"啊:
我想噶?
稳食啫!
犯法啊?

天籁

睇到楼主发葛文字我好似又听到距把声.........

☆fileee☆

^_^，超好笑啊。。。。。。。。。
等我收藏下先。。。D语言太精警拉～～佩服。。。
如果可以去现场听就正，不愧为栋笃笑始祖

听海

我都要学佢咁,吹水

爆热神猪手

“一出世就更年期～～～”